قالوا السياسة مهلكة بشكل عـــــــــــام
و بحورها يا بني خشنة مش ريش نعام
غوص فيها تلقي الغرقانين كلهــــــــــم
شايلين غنايم .. و الخفيف اللي عـــــام
عجبي !!!
صلاح جاهين
النهاردة أخر جلسة من جلسات القضية , و هى جلسة النطق بالحكم , كان كل الناس
و الشهود و وسائل الإعلام داخل المحكمة ، دخل
القضاة للمنصة , و أول ما أخد القضاة أماكنهم
لقينا أب دخل و شايل إبنه و بيصرخ : يا سيادة
القاضى إسمعنى, إسمعونى أبوس إيديكم , عندى
كلام يخص الدكتورة الظالمة " إيمان صالح " .
القاضى : أنت مين ؟ إسمك و سنك و مهنتك
و عنوانك
الأب : أنا صابر ، صابرالمصرى أبو أحمد الطفل الصغير اللى أنا شايله و بيموت
على إيدى ، أنا عامل نظافة غلبان , مرتبى ملاليم ما تأكلش عيش حاف , بكمل لقمتى و لقمة
عيالى من إحسان الناس ، صاحب محل , أو بيه فى عربية , يدينى حسنة من هنا , على صدقة
من هناك ، و ساعات لما يضيق بينا الحال بكمل لقمتى من الزبالة , و بواقى الأكل الطازة
من المطاعم و القرى السياحية , و يا ما عطف عليا " كابتن روما " و أولاده .
فى يوم إبنى تعب و جاله مغص بالليل , جريت به على مستشفيات الحكومة قالولى تعالى
الصبح , مفيش دكاترة , مفيش دوا , مفيش حاجة خالص ، شيلته على إيدى و مشيت أبكى فى
الشارع , مش عارف أروح به فين , لقيت واحد قالى أنا مسئول الأمن فى مستشفى الدكتورة
" إيمان صالح " و إنها ست طيبة و بتعالج الأطفال الفقرا بالمجان , جريت معاه
و كشفوا عليه و قالوا عنده الزايدة , و دخلوه
يعمل عملية و خرج , لقيت بعد العملية الفتح كبير , سألتهم قالولي بيتهيألك بس علشان
جسمه صغير ، قلت أنا هفهم أكثر من الدكاترة
, الكلام ده كان من 3 شهور , و دلوقتي إبني تعب جاله فشل كلوى .
لما دخل المستشفى , الدكاترة قالولي كان لازم يحاسب في أكله بعد ما شال الكلية
اليمين , قلت لا ده شايل الزايدة بس , قالولي لا ده شايل كلية , و كليته مش موجودة
.
جريت على مستشفى الظالمة الحرامية , و هناك قابلت بتاع الأمن إياه , و قالي
سامحنى , ربنا جابلك حقك بعد ما إبنى مات في حادثة إمبارح , و قالي كلية إبنك إتسرقت
لإبن رجل أعمال قطري , و انا جاى بقولكم إعدموها , و جبولى حق ابني زى ما ضيعت حياته
, و دي كل الأوراق و المستندات , أوراق كثير سابهالى موظف الأمن , و طلب منى أقدمها للمحكمة النهارده
, و هو هرب علشان رجالتها ما تقتلوش هو و عياله .
طبعاً حصلت حالة من الثورة داخل القاعة ، ناس كثير هتفت ضد الأطباء , و وصفوهم
بالجزارين الظلمة , و ناس تانية هتفت ضد القطريين , و قالوا : يسقط الخونة , يسقط اللصوص
, يسقط العملاء ,
و هنا وقف الشاهد القطري و قال ممكن كلمة يا سيادة الجاضى .
القاضى : عايز تقول إيه ؟
أنا " فهد جاسم خليفة " شاهد الإثبات فى الجضية المرفوعة ضد السيرك
, و أبو الطفل " مهند " ، إبنى كان مريض بالفشل الكلوى من سنة , و كان محتاج
زرع كلى , و فعلا جالولى إن " دكتورة إيمان صالح " عندها مستشفى إستثمارى
كبير و ناجح , و فعلا من 3 شهور إتصلت بيا فجأة بالليل , و جالت فيه طفل توفى و إن أهله وافجوا يتبرعوا بكليته , ولازم نعمل الجراحة
حالاً ، أكيد فرحت و عملنا الجراحة , و لكن صدجونى ما كنت أعرف الحجيجة , و عندى إستعداد
أعالج ولدك بأكبر مستشفى بالعالم , و بدى أجول شي تانى , أنا ما شهدت زور , بالعكس أنا جولت شئ حسيته , و هو الحزن فى عيون اللاعبين
, فعلا حالهم مهموم , و اتعاطفت معاهم بعد كلام " دكتورة إيمان ل" ما صورتلى
حالة الفجر لشباب السيرك , و عنف حياتهم , و حاجتهم لحياة كريمة .
بعرف إيش فكرتكم عن قطر بسبب السياسة , صدجونى إحنا شعب طيب ما لنا صالح بالسياسة
, ما نعرف الكراهية , و بنحب مصر و المصريين , و كيف ما عندنا ناس لا تحبوها مثل الشيخة
موزة , عندنا الشيخة " شيخة " الأميرة القطرية و أمها مصرية
, و هى بتحب و تعشج تراب مصر , أرجوكم لا تظلموا الشعب بظلم الحكام , و من اليوم إبن
صابر المصرى راح يكون إبنى , و متكفل بعلاجة حتى لو برجعلة كلية ولده تانى .
أنا : سيادة القاضى , ممكن كلمة
القاضى : إتفضلى , إسمك و سنك و عنوانك
أنا : صديقة لكل فريق السيرك , و عنوانى مصر , و سنى ألاف السنين تعب و ظلم
و عناء و صبر , زى صبر عم صابر ، صدقونى أنا حسيت الصدق فى كلام الأخ القطرى , هو قال
الحقيقة ، أول مقال كتبته عن أصدقائى هو أحزان بلياتشو , بسبب مسحة الحزن فى عيونهم و دى حقيقة فعلا ، أغلب
الكوميديانات و لاعبين البلياتشو هما أميل للحزن , و أكبر مثل هو " صلاح جاهين
" رغم كل كتاباته المرحة كان مريض بالإكتئاب
, أما بالنسبة " للدكتورة إيمان صالح " فوجود طبيبة باعت ضميرها , و شرفها
المهنى لا يعنى إن كل الأطباء فاسدين ، أنا شفت بعينى طبيب بيكشف على المرضى الفقرا
بالمجان و بيعطيهم حق العلاج و الخير لسه موجود , و ليا رجاء كإنسانه لازم كلنا نؤمن
إن التعميم عمى , مش لازم ناخد الشعوب بذنب حكامها , و لا نعمم فساد شخص على فئة من
الناس ، أرجوكم بلاش نعمم لأننا أكيد هنظلم .
القاضى : الحكم بعد المداولة
بجد منظر الطفل ابن " صابر " مؤلم , و حقيقى حياة صعبة , و ناس تحت
خط الفقر , و كلنا نتمنى يجى يوم يعيش فيه المواطن المصرى عيشة كريمة , و كمان موقف
" فهد " القطرى كان فى غاية الشجاعة و النبل , و مش لازم ناخد الشعوب بذنب
حكامها , أما " دكتورة إيمان " أكيد هتاخد جزاءها هى و أمثالها .
و بعد دقايق دخل القضاة للجلسة للنطق بالحكم .
القاضى : بعد الإطلاع على أوراق القضية 500 جنايات لسنة 2014 تم الحكم ببراءة
" ابراهيم اليمانى " الشهير "
بروما اليمانى " و معاودة السيرك إلى نشاطه فى نفس مكانه السابق , و يتم تحويل
كافة الأوراق المقدمة إلى المحكمة ضد المدعين إلى النيابة للتحقيق فيها , رفعت الجلسة
.
يحيى العدل , كانت الكلمة دى هتاف كل الموجودين بعد ما اتضحت كل الأمور
, حقيقى على قد الفرحة بظهور الحقيقة على قد
ما بكينا من كم الظلم و الفساد الموجود فى مجتمعنا , إحنا محتاجين ثورة قيم و أخلاق
و مبادئ , لازم كل إنسان يثور على الفساد اللى جواه و إلا هنضيع , لان التغيير و التطهير
يبدأ مننا إحنا , و مهما إتغيرت القيادات عمرها ما هتغير شيء لو مفيش إرادة حقيقية
جوه كل إنسان فينا للثورة على كل فساد جواه هو نفسه قبل غيره .
بقلم ناني محسن عبد السلام
ليست هناك تعليقات:
إرسال تعليق