السبت، 20 أغسطس 2016

اليوم 5 - قلب الأسد وأخلاق الفرسان


ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
عجبي !!



                                                                                    صلاح جاهين






 كابتن روما اليمانى

يا ترى " كابتن روما " بيخاف من إيه ؟ سؤال غريب خطر على بالى إني أسأله      ل " كابتن روما " بعد حوارى معاه ، تفتكروا  قناص , و مروض وحوش , و لاعب أكروبات , ممكن يكون بيخاف زينا ؟ أعتقد أن أفضل من يجيب على السؤال ده هو " كابتن روما " نفسه .
و في الحقيقة بعد تفكير , قررت إني أوضع حد للحيرة و أسأل " كابتن روما " مباشرةً السؤال ده
أنا : " كابتن روما " ممكن أتجرأ و أسألك بتخاف من إيه ؟
كابتن روما : زي إيه ؟
أنا : يعنى إيه ممكن يخوفك ؟
و بعد صمت دقيقة قال :  الحمد لله هخاف من إيه ؟
و لأن عقلي مش مستوعب إن مافيش حد في الدنيا ما لوش أي مخاوف , كان عندي إصرار طالما هو إنسان و تكوينه الجسماني زى أي إنسان , عنده غدة كزرية و بتفرز هرمون أدرينالين لازم يخاف , لكن من إيه ؟ و هنا دار حوار غريب بينى و بين الكابتن روما .
انا : قولي يا كابتن يعنى مثلا لو حصلت مشكلة بينك و بين ناس , و حصلت خناقة كبيرة ,  تخاف ؟
الكابتن روما : ضحك و قالي لا , أتخانق ليه أساساً ، صحيح أنا بعرف أتخانق , بس ليه , أنا بحب كل الناس و هما كمان بيحبوني .
أنا : بلاش دي , إفرض مثلا , إن الناس دى واجهوك بكلب شرس ,  هتخاف ؟
كوكو : و هنا لقيت " كوكو " نبح بصوت عالي " هو هو هو "
أنا : طبعاً فهمت خلاص يا " كوكو "  أنا بقول مثلا ، يعنى شفتني جبت الكلب و جيت , و بعدين عارفه إنك مش هتسيب الكابتن , دى حتى تبقى مش أخلاق كلاب .
أنا : بلاش السؤال ده , إفرض مثلا مثلا يعنى , الناس دول جابولك أســــــــــــــــد كبير , هتخاف ؟
شطا : لقيت الأسد " شطا "  وقف جوه القفص و بيحاول يفتح باب القفص و صوته يعلا  " هاااااااااااااااااااا "
أنا : طبعا فهمت خلاص يا " شطا "  أنا بقول مثلاً مثلاً ، يعنى شفتنى جبت الأسد و جيت , عارفه إنك مش هتسيب الكابتن , دى حتى تبقى مش أخلاق أسود .
أنا : بلاش كل الكلام ده خالص يا كابتن , إفرض مثلا إحنا بنقول مثلا الناس دى فتحوا عليك مطواة ؟
الكابتن روما : ضحك و قالي أنا !!! خناقة و كمان مطواة ليه !!! ده أنا فنان , هو أنا بلطجي !!!
أنا : المهم هتخاف من السلاح الأبيض و لا مش هتخاف ؟
الكابتن روما : على فكرة أنا قناص , و الضرب ده بجد ، إنتي شفتي السلاح بينضرب من مسافة قد إيه ؟ و سمك الخشب اللي بيضرب عليه قد إيه ؟ يبقى هخاف منه ليه ؟
و طبعاً لأني عايزة أتأكد , إن الضرب ده بجد مش خدعة , جريت بسرعة أشوف الخشب , و أثار السلاح الأبيض عليه ,  فعلا أثار السلاح موجود رغم سمك الخشب ، فعلا ضرب محتاج مهارة و قوة لكنى بردوا ما وصلتش لإجابة سؤالي .


كابتن روما و مارينا و فقرة القناص بالقناع الأسود
الكابتن روما : نفسي أريحك عايزة توصلي لإيه بس  ؟
أنا : بلاش كل ده إفرض مثلا مثلا يعنى الناس دى جابتلك متفجرات هتخاف ؟
الكابتن روما : ضحك و قالي نفسي أفهم مين الناس دول , و يجيبولي متفجرات ليه ؟ ..... على فكره إنتي بتٍسألي أسئلة غريبة قوى بس لذيذة هههههههه
أنا : يا كابتن التفجيرات في كل مكان دلوقتي , لو إتوجدت فى الجو  ده و ضرب النار حواليك هتخاف ؟
الكابتن روما : شوفي مبدئياُ أنا ضد كل التظاهرات اللي بتحصل , لأن بسببها شباب زى الورد بيموت على الفاضى , و الشباب ده لو عاش هيعمل حاجات كثير حلوه للبلد , و أنا مش هتوجد فيها أصلاً إلا لو بالقدر , فطبعا مش هخاف ,  الأعمار بيد الله .
أنا : يا كابتن ريحني بس بتخاف من إيه ؟
كابتن روما : أنا هريحك قالوا لي زمان عمرك ما هتعرف الخوف , إلا لما يكون عندك أولاد , و فعلا بعد ما ربنا رزقني بأولادي بقيت بخاف عليهم .
أنا : طيب قولي يا كابتن إمتى تلجأ للعنف ؟
الكابتن روما : أظنك عرفتي إني أقدر أتعامل مع كل ده , مع الكلاب و الوحوش و السلاح الأبيض والأسلحة النارية و لكن عمري ما بلجأ للعنف , لأني فنان مش بلطجي ، و كل لعبنا و مهاراتنا في القنص , و التعامل مع الوحوش مش عنف ,  لكن فن بنلعبه في السيرك لإسعاد الناس , مش علشان نخوف الناس , و دي مش أخلاقنا , بمعنى إني عمري ما هقف في موقف يحصل فيه عنف بيني و بين أي حد .
خلص الحوار بيني و بين " كابتن روما " ، و إتضح من الحوار إن الموضوع في الأول و في الأخر مسألة أخلاق , و عقل يستخدمه الإنسان لمواجهة أي مشكلة , رغم امتلاكه لكل أدوات القوة , و مهارات استخدامها , و الإنسان المعتاد على استخدام العنف للأسف هو أضعف الناس عقل و علم و حجة و خلق .
بجد الحوار ده إهداء لشباب كثير , أول ما يحصل معاه موقف , أو حتى  كلمة تضايقه , يبتدي يهين و يغلط و يسب و يلعن , و طبيعي يحصل تشابك بالأيدي , و بعد شوية يتصل بأصحابه , و أصحابه توصل معاها أسلحة بيضاء , و ممكن كمان مسدسات و مدافع أليه , ودايماً بيتفاخروا بأسلحتهم و بقدراتهم على الحشد لأكبر عدد من " البلطجية " , و لما تتناقش مع حد فيهم يقولك لا دي مسألة كرامة و أنا مش ضعيف !!!
الحقيقة إن الشاب لما يلجأ للعنف مش معناه إنه شاب قوى , أو بيملك قدرات خاصة و مواهب فذة أبدا ، ده و إن دل يدل على افتقاد التربية , والأخلاق , و الخوف من الله , ده كمان دليل على افتقاد القدرة على التفكير لحل أي مشكلة بطريقة سلمية , و راقية , ومهذبة .
طبعا فيه ناس كثير ممكن تقرا الكلام ده بغير قناعة , لكن ممكن أطرح سؤال مهم و منطقي ، مش في إيد " كابتن روما " إنه يحل أي خلاف مع أي حد بأنه يفتح باب القفص الحديد للأسد و أو بضربة سلاح متنشن صح , يخلص من عدوه ؟
و رغم كل المهارات دي نلاقى " كابتن روما " بيقول أنا فنان مش بلطجي ، فعلا السيرك مدرسة كبيرة جدا في تعليم الانضباط و الأخلاق , و الرحمة , و الاحترام اللي غابوا عند ناس كثير جداً في المجتمع .


حـكــــمة

استخدامك للعنف في حل المشاكل لا يعنى قوتك ،
و  استخدامك للعقل و الأخلاق لا يعنى ضعفك ،
فأقوى الناس من يملك نفسه وقت الغضب , رغم قدرته على استخدام القوة
قوتنا في عقلنا و علمنا

رابط المقال على شبكة صدى بورسعيد الاخبارية 
في 9 ابريل 2014

http://www.sadaportsaid.com/10588/

 اضغط لدخول المقاله

ليست هناك تعليقات:

إرسال تعليق