لا تجبر
الإنسان ولا تخيّره
يكفيه ما
فيه من عقل بيحيّره
اللي
النهارده بيطلبه ويشتهيه
هو اللي
بكره ح يشتهي يغيّره
عجبي !!!
صلاح جاهين
كابتن مجدي اليماني
و الإنترنت
" كابتن مجدي
اليماني " هو ابن أخو "كابتن روما " ، شاب جامعي ، طالب في كلية سياحة و فنادق ، من أهم نجوم السيرك , و له
مشاركات تمثيلية تعتبر خطوات أولى للتمثيل , لأنه كان ضمن مجموعات العمل التاريخي
الكبير في مسلسل نابليون و المحروسة .
" كابتن مجدي
" مثقف جدا , و مهذب جدا جدا , زى باقي
فريق السيرك ، و في الحياة الطبيعية هو أميل للجدية , بمعنى أنه بعيد عن التهريج ,
و مش هيحاول يعمل أي حركة تضحكك زى ما الناس العادية ممكن تهرج في حوارها , وصوتها
يعلا بالضحك لأن ضحكته ابتسامة خفيفة .
في عصرنا الحالي
طبعا لما بنتعرف على أصدقاء جدد لازم نضيفهم لقائمة أصدقائنا و الا ما نبقاش أصحاب
, و بما إن "كابتن مجدي" أصبح من أهم أصدقائي قررت النهاردة إني أنزل
للسيرك , و أنا ناوية أعمل له إضافة , و أكيد
هيقبل الإضافة , و طبعاً عملت حسابي و أخدت معايا اللابتوب , متضبط
على موقع الفيسبوك عدل , يعنى لا مفر هضيفه هضيفه.
و طبعا كلنا و أي
إنسان طبيعي في عصرنا أول شيء يفكر فيه أول ما يفتح عينيه الصبح هو الفيسبوك , و
أخر شيء يشوفه قبل ما ينام الفيسبوك , علشان كده تعاملت مع "كابتن مجدي"
و "كابتن روما " على إنهم ناس عاديين و طبيعيين زينا كده و لكن كانت
المفاجأة المذهلة !!!!
أول ما وصلت السيرك
قابلت "كابتن مجدي" و قلت له على فكرة أنا عملتلك إضافة ممكن تعملي قبول
؟
و لكن الغريبة إنه
قال : إن أنا موجودة فعلا عنده على صفحته الشخصية , و إنه عارف الأكونت بتاعي , و
طبعا لأني ما شفتش الأكونت بتاعة في الأصدقاء عندي , و لا شفت بوستاته , أكدت له إنه
مش عندي في الأصدقاء , و لكن " كابتن مجدي " قالي : أقولك أمارة , صورة
البروفيل عروسة لعبة لابسة فستان احمر , تمام كده ، قلتله : صح هو كده .
فعلا "كابتن مجدي"
عارف الصورة , و عارف الاسم , ولكن بردوا هو مش عندى , و أنا أصريت قصاد إصراره
إننا نفتح الإنترنت و حصل الموقف ده ..
أنا : شوف يا
كابتن أنا جبت اللاب , و آدى كابل النت نوصله باللاب ، أنا اعمل إضافة إنت تعمل
قبول سهلة خالص دى .
كابتن مجدي :
فيسبوك هنا !!! و في السيرك كمان !!! ميعاد العرض قرب و بعدين "كابتن روما "
لو شافنا هيعمل مشكلة كبيرة جدا .
أنا : ده ثواني مش
هيلحق خالص
كابتن مجدي : صدقيني
إنتي عندي على صفحتي أصلا
أنا : طيب خلاص
البكا على رأس الأكونت , افتح بقا
و فجأة وصل "
الجنرال روما " , و شافنا قدام اللاب , و كأن حصلت كارثة
كابتن روما : إيه اللي
بتعمله ده يا كابتن ؟
مجدي : دة ال ....
ال .... حتى الكلمة مش عايزة تطلع ...... ده الفيسبوك يا كابتن
كابتن روما : و
الفيسبوك بوك بيعمل إيه في السيرك ؟
مجدي : ما هو ده اللي
قلته والله يا كابتن , بس هما كانوا دقايق و هنقفل على طول ... إنتي عاجبك كده ؟؟؟
كابتن روما : إنت
مش أخدت ساعتين النت بتوعك من 5 الفجر لغاية 7 صباحاً , إيه عايز تدمنلي الفيسبوك
أنا : لا لا لا يا
كابتن ما تقلقش من الحكاية دي خالص , فيه مصحات في الصين بتعالج إدمان النت !!!
كابتن روما : هو
انا لسه هستناه لما يروح الصين يتعالج و يرجعلي , و العرض قدامه 10 دقايق , ده ما
بقاش " سيرك اليماني " ده بقا كوفي نت اليماني , فين كابل الإنترنت أنا
هفصله .
و فعلا راح " كابتن روما " فصل كابل الإنترنت و لكن " محمد اليماني " ابن " كابتن روما " حاول يهدى الموقف . و يقوله خلاص يا كابتن سامح مجدي يا كابتن , طيب علشان خاطري يا كابتن , و لكن " كابتن روما " أصر إنه يفصل الكابل لأن مجدي غلط , ولكن أنا ما كنتش فاهمه هو "كابتن روما "زعلان قوي كده ليه , و إيه موضوع الساعتين دول ؟؟ يعملوا إيه دول طيب ؟؟ ولأن مجدي عزيز عليا , وأنا أتسببت في زعله , قلت أتدخل و أصلح الموقف .
أنا : " كابتن
روما " حضرتك ليه زعلان كده من "كابتن مجدي" على فكرة أنا السبب
لأنه كان رافض فعلا .
كابتن روما : أنا
مش زعلان من مجدي , أنا خايف على مجدي , و لما افصل النت أحسن ما يقع وتتكسر رقبته
.
أنا : معقول ....
ليه ؟
كابتن روما : لأن مجدي
دلوقتي مفروض إنه هيلعب السلم المتحرك , عارفه يعنى إيه ؟ يعنى لازم يكون متحكم في
كل أعصابه , و في كل عضلة في جسمه , و لو اختل توازنة هيقع , و طبعاً أنا محدد لكل
واحد ساعتين بس في اليوم للإنترنت , لأن الأوقات الطويلة على النت بتسحب النظر , و
بتسبب مشاكل في الرقبة , و الفقرات كمان بتتعب , و بعد كده تؤدى لعدم توازن , وممكن
جدا " كابتن مجدي" يقع و تبقى كارثة .
أنا : لا لا لا
مفيش الكلام ده خالص خالص , عندك أنا مثلا يا كابتن , بشتغل على الكومبيوتر من
أكثر من 18 سنة , و بقضي أكثر من 15 ساعة في اليوم , و ما حصليش أي حاجة خالص , دي
إشاعات يا كابتن .
كابتن روما : ما
عندكيش أي مشاكل خالص
!!!!!
أنا : خالص
كابتن روما : خالص
!!!!! طيب خلاص هنبدأ العرض
أنا : كابتن كابتن
ما ألاقيش معاك مسكن قوي قبل ما نبدأ العرض ؟
كابتن روما : قوي
هنا و في السيرك هي صيدلية ... ليه مالك ؟؟؟؟
أنا : رقبتي
بتوجعني قوي قوي يا كابتن
كابتن روما : خالص
!!!!!
مجدي : إيه اللي
بتعمليه ده , إنتى مرة تقلبيها كوفي نت , و مرة تقلبيها مستشفى , العرض خلاص بدأ .
أنا : روحوا اعرضوا
و انا هطلع الموبايل ... و ده بقا عليه فيسبوك على فكره , و مش عايزة الكابل
بتاعكم
و فجأة قبل ما
كابتن مجدي يخرج من ورا الستارة للعرض , لمح صفحة الفيس على موبايلي , فجأة خطف من
إيدي الموبايل
كابتن مجدي : إيه
ده ؟
أنا : موبايل يا
كابتن
كابتن مجدي : و إيه
اللي عليه ده ؟
أنا : فيسبوك يا
كابتن
كابتن مجدي : و
مين الأكونت ده ؟
أنا : ده أكونت
إسمه " أنا فيجو اليماني " يا كابتن
كابتن مجدي : ما
هو أنا " فيجو
اليماااااااااااااااااااااااني "
أنا : إيه ده إزاي
ما اخدتش بالي من الاسم ؟ و لا من الصور كمان ؟ هو فعلا عندي يا دي الكسوف ، إيه
الناس دي , و إيه الانضباط ده , كل شيء ماشي بنظام و بمواعيد , بصراحة بصراحة , حياتهم صعبة قوي قوي يا خااااال
إدمان التكنولوجيا
و أسطورة " بيجماليون
"
المفروض إن
الإنسان اخترع التكنولوجيا بما فيها الإنترنت و الفيسبوك , و المفروض إن الإنسان
هو المتحكم فيها , ولكن مع الوقت حصل العكس أصبح الإنسان مُدمن للتكنولوجيا , و
لما أدمنها تحكمت هي فيه , و أصبح مملوكا لها , و هو ده بالضبط نفس المعنى في أسطورة " بيجماليون " ، أسطورة إغريقية بتحكي
عن فنان اسمه " بيجماليون " , نحت تمثال " فينوس " المُلقب
بإلهة الجمال , علشان يكسر به غرور النساء الجميلات في المدينة , و فعلا نحت تمثال
غاية في الجمال و الروعة , لدرجة إنه أصبح بيقضي كل وقته في مشاهدة جمال التمثال ,
و بعدها وقع في غرام التمثال و أصبح أسيرا له .
أبطال السيرك هنا
بيروضوا كل شيء , ثعابين و وحوش و نار حتى الجاذبية الأرضية , و قبل كل ده
روضوا عقولهم و أجسادهم و أعصابهم , علشان كده ما كانش صعب عليهم ترويض
التكنولوجيا كمان , بأنهم يتحكموا في أنفسهم , و تكون وسيلة للتواصل , مش مادة
للإدمان .
أبطال السيرك و إدمان المخدرات
إذا كان "كابتن
روما "وأسرته تغلبوا على إدمان الإنترنت , كان لازم أسأله عن الإدمان التقليدي
بكل صراحة ، عن شرب الكحول و الحشيش و البانجو و السجاير الملفوفة و غيره ... و
لكن "كابتن روما "سكت دقيقة وقالي : فيه كثير بيعملوا كده , لكن مع الأسف
اللي بيعمل كده بيقع ، إما هيفقد توازنه في العاب التوازن , او هيفقد هيبته قدام
الحيوان ، و لو فقد هيبته , وقتها الحيوان يفترسه , يعنى باختصار هتكون حياته هي الثمن .
الإنسان أقوى
مخلوقات الله
"كابتن مجدي" و" كابتن روما "و أبطال السيرك ,
نموذج بيثبت إن الإنسان فعلا هو أقوى ما خلق الله على الأرض , و كل شيء ربنا خلقه
مُسخر للإنسان , و الإنسان قادر على تسخير كل شيء بالإرادة و العقل اللي ربنا ميزه
به عن كل المخلوقات .
بالعقل الإنسان
روض الوحوش , و تحكم في النار , و في قوانين الطبيعة , و تحكم في قدراته , و تحدى
ذاته , فمش هيكون صعب عليه التحكم في التكنولوجيا .
فعلا السيرك مدرسة
كبيرة جداً لكل إنسان عايز يتعلم , و لو السيرك هيخرج جيل خلوق منضبط ذكى واعي , أرجوكم
اعملوا في كل مدرسة و في كل شارع سيرك يعلم
الولاد , يمكن نلاقى أجيال مختلفة .
مفاجأة للقارئ
عزيزي القارئ , طبعاً
حضرتك قريت قصة الحوار اللي دار بيني و بين "كابتن مجدي" و" كابتن
روما " و شفت صور "كابتن روما " بيفصل كابل الإنترنت بنفسك , أحب
أقولك : ان كل الحوار ده ما حصلش رغم
الصور , و هي قصة من وحى الخيال , لأنه ببساطة "كابتن مجدي" ملتزم
بساعتين الإنترنت , و أنا لا يمكن هخلي "كابتن مجدي" يكسر أوامر "كابتن
روما "و يقف في موقف محرج , و ده درس
تاني يعلمنا إن كثير من الأخبار الموجودة على الإنترنت و الفيسبوك للأسف مغلوطة , رغم
الصور المقترنة بالخبر , بتطلع تلفيق و كذب و تشهير , حبينا بس نثبتلكم ده بالبرهان و الدليل
العملي ، و يا رب نلاقى شبابنا في يوم زى الشباب دول , و يا رب نلاقى بلدنا في يوم
تتغير للأفضل .
رابط المقال على شبكة صدى بورسعيد الاخبارية
في 14 ابريل 2014
ليست هناك تعليقات:
إرسال تعليق