إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي !!!
صلاح جاهين
"
شكلك فاهم يا نصه " جملة شهيرة من فيلم (غبي منه فيه ) , في موقف جمع بين
أثنين , هما " سلطان " غبي و شكله بيقول إنه غبي , و صديق له اسمه " نصه
" غبي ولكن شكله بيقول إنه فاهم و مش غبي , علشان كده كان دايماً صديقه"سلطان"
يقوله " شكلك فاهم يا نصه " ولكن الواقع مع
الأسف إنه غبي , مش فاهم حاجة خالص.
هنا في
السيرك ما فيش أي مجال للغباء , لا من إنسان أو من حيوان , و ده أثبته الكلب " كنزو " , بموقف يدل إن الحيوان عنده
ذكاء اجتماعي وقدره عجيبة على التواصل البصري .
"
كنزو " كلب كبير لكن كلب أليف , و فقرته من
إبداعات " كابتن روما " لأنه ابتكر في فقرة الوحوش , إنها تكون بطولة
مشتركة بين الأسدين و معاهم " كنزو " و طبعاً ده عمل صعب جداً إن
يكون زميل العمل للأسد فريسة بالنسبة له, لكن التجربة نجحت و الأجمل إن الأسدين حالياً
عارفين إن " كنزو " زميل لهم لا يمكن يفترسوه .
أول
يوم دخلت فيه ورا الستارة كان أول لقاء ليا مع " كنزو " , وكان في القفص
وقتها , كنت واقفة مع "كابتن مجدي " وأول ما شافني " كنزو " بدأ ينبح بصوت
عالي جداً , و الأغرب أنه حاول يفتح باب القفص الحديد بأسنانه , و لكن "
كابتن مجدي " حاول يسكته , و بعدها قاله بصوت عالي " بس خلاص
" ، لقينا " كنزو " بدأ يتصرف بشكل غريب جداً ، بدأ يدب بأحد رجليه
الأماميتين في الأرض , و كأنه طفل بيدبدب في الأرض اعتراض على أمر والده .
مع
تكرار الزيارات اعتاد " كنزو" على وجودي و مبقاش ينفعل , ولكن النهارده لما دخلت السيرك
قبل العرض , فوجئت إن زوج وزوجته من الجمهور دخلوا ورايا ورا الستارة , و لأن " كنزو " لماح , بدأ
ينبح بصوت عالي و كأنه بيقولهم امشوا من هنا , تصرف عادي من "كنزو " تجاه
الغرباء ، لكن المدهش في الأمر تصرف غريب إتصرفه " كنزو " ....
"
كنزو " بعد ما نبح بدأ يركز في عينيا
, وكأنه بيسألني الناس دي معاكي ؟! ، نظرة " كنزو " كانت مفهومة جداً , فبدأ ينبح عليهم ويعيد نفس النظرة
ليا , و كأنه بيقولي تاني لو هما معاكي أهلاً بيهم , و لو أغراب إيه جابهم هنا , و
هنا الزوج وزوجته نظروا ليا و " لكنزو " و كأنهم فهموه , وشعروا بالإحراج من نظراتي أنا
و " كنزو " وخرجوا .
" كنزو " ماذا تفعل لو كنت مكاني ؟
تعرف يا " كنزو " رغم إنك كلب وحيوان , لكنك فعلا عندك قدرة على التواصل البصري , وعندك ذكاء اجتماعي , و تعرف إزاي تحترم أصدقائك , و تحترم كمان أصدقاء أصدقائك , و عندك استعداد تحمي صاحبك حتى الموت ، إن كان الوفاء طبعك يا صديقي إنت أدهشتني بذكائك , و قدرتك على التواصل البصري , و لكن مع الأسف يا " كنزو " فيه ناس بشر مُكتملي العقل و الحواس , نتواصل معاهم سمعي و بصري ولفظي و حركي و تحكى و تشرح دهر , و في الآخر تكتشف إن صاحبنا بيتكلم معاك في شيء تاني خالص بعيد عن أصل الموضوع تضطر تقول " شكلك فاهم يا نصه ".
تخيل
إن في عالم البشر ممكن الصديق يخسر صديقه لأنه أساء فهمه , و بعد ما تتكلم مع
أصدقائك و المفروض إنهم الأقرب ليك , تكتشف إنهم بعد كل ده مش فاهمينك , و كمان
بيسيئوا الظن بك , و ممكن تلاقى مواقف صادمة وتلاقى نفسك تايه و بتقول ...هما
عايزين إيه ؟ مين دول أساساً ؟ أصحابي دول و لا مين ؟ من أنتــــــــم ؟
تخيل
إن في عالم البشر , ممكن نقاش أو حوار بسيط يقلب بخلاف و نزاع , و شوارع بتقفل و
دماء تسيل بسبب سوء الفهم والاندفاع .
تخيل
إن في عالم البشر , التعليم اتدهور , لأن الطالب ما عندوش استعداد يفهم أو يتعلم ,
و كمان أغلب المدرسين خلاص فقدوا استعدادهم لتعليم الطلاب , و التعليم أصبح تجارة
و تلخيص و حفظ , و لغينا الفهم و العقل .
تخيل
إن مش بس ده حال العامة ، لا ده كمان حال النخبة ، جرب تسمع برنامج توك شو
يجمع أحسن نخبة في البلد , وبعد أول خمس دقايق الحوار يقلب خناقة , وتلاقى
كله بيتكلم في وقت واحد , وأنت مش سامع و لا فاهم منهم أي حاجة , لدرجة إنك تبطل
تشوف التوك شو علشان تحاول تحافظ على باقي معلوماتك و فهمك , لأنك في الغالب أكيد
هتخرج ناسي أي معلومة اتعلمتها , و مش فاهم و متلخبط و بتقول مين الناس دي ؟ و
عايزين مننا إيه ؟ أنا مين أساساً ؟
تخيل
كل كلامي ده نبذة صغيرة جدا من كلام كثير , و حزن كبير جوايا , وإني ممكن أقولك تخيل من هنا لسنة قدام .
آه يا "
كنزو " لو تحط نفسك مكاني و مكان ناس كثير , تصدق يا صديقي إحنا حالنا
للأسف أصبح يصعب على الكلب الأعور الحزين , مع كامل تقديري واحترامي يا صديقي
لكل عالم الكلاب الشرفاء .
و لكن
فوجئت برد " كنزو " كان رد غريب لما قال " ماحدش يقولي حط
نفسك مكاني , أنا حاطط نفسي مكان نفسي أساساً بالعافية " , كفاية إنكم لما
تحبوا تشتموا إنسان تقولوا عليه كلب و أبوه كمان كلب " .
معاك حق يا " كنزو " إحنا آسفين , و أنت أنقى و أحسن من نوعيات كثير
من البشر , خليك كده كلب وفي و ذكي و لماح .
رابط المقال على شبكة صدى بورسعيد الاخبارية
في 29 ابريل 2014
http://www.sadaportsaid.com/12405/
ليست هناك تعليقات:
إرسال تعليق