الأربعاء، 17 أغسطس 2016

اليوم 22 - براءة إيميليا تحطم شعارات الممولين



ما آنتاش بتلعب ليه يا روح بابــــا ؟
و لا عسكري و لا لص في عصابة ؟
إلعب أسد أو ديب رهيب أو غـــــزال
دي الدنيا في نهاية المطاف غابـــــة
عجبي !!!
صلاح جاهين



النهاردة نظمت الجمعيات الحقوقية الممولة مظاهرة , علشان تأثر على الرأي العام قبل صدور الحكم فى القضية , و كانت نصيحة " كابتن روما " بعدم الإهتمام بالمظاهرة أو أي استفزاز , لأن موقفنا فعلا قوى , و القضية تكاد تكون منتهية لصالحنا .

كنا وقتها مع " رمزى " و "جولنارا " و " إيميليا " بنتهم فى القرية السياحية المقيمين فيها ، " رمزى " و "جولنارا "  لما عرفوا موضوع القضية من وسائل الإعلام ,  قرروا ينزلوا لزيارة " كابتن روما " و الإطمئنان عليه , و على قد فرحتنا بزيارتهم لكن أكيد كنا نتمنى زيارتهم فى وقت أحسن من ده .

" كابتن روما " لما عرف بميعاد وصولهم , قرر نكون إحنا فى إستقبالهم فى القرية السياحية , و فعلا وصلنا القرية و هى فى موقع إستراتيجى جدا بالنسبة للمدينة , و المكان ده كان نفسه مكان المظاهرة .

بدأ صوت المظاهرة يقرب مننا , و هنا " إيميليا " اتسللت و خرجت للشارع ووقفت قدام المظاهرة ، موقف غير متوقع من " إيميليا " ,  و " إيميليا "  3 سنين صحيح لكن ذكية و فاهمه إن فى ناس مش بتحب السيرك , و عايزة تقفله , و ان الناس دى ناس مش طيبين و لازم نحبسهم مكان " كابتن روما " .

أول ما وقفت " إيميليا "  قدامهم , الكل وقف يبتسم " لإيميليا " ,  و لكن " إيميليا " ا قالت بصوت عالى :  I love the circus , رد عليها المتظاهرين و قالوا : يسقط " سيرك اليمانى " بكت " إيميليا "  , و كررت الكلام ,  انا بحب السيرك .

المشهد أثر جدا فى موظفي إستقبال القرية و الأمن ,  فرددوا ورا ايميليا :  I love the circus   , و إنضم " لإيمليا "  كل سكان القرية و خصوصاً الأطفال , و أصبح مؤيدين " إيميليا "  أكثر من مؤيدين الممولين , فأنسحبوا , و كسبت براءة " إيميليا "  الطفلة الصغيرة , لانها ما تعرفش الدولارات , و لا تعرف الزيف , و لا العمالة .

" إيميليا "  رمز للخير و الجمال و النقاء و الفطرة الطيبة , فكان لازم" إيميليا " تتصدق و هما ما يتصدقوش


بقلم ناني محسن عبد السلام

ليست هناك تعليقات:

إرسال تعليق